Fljótsdalshreppur fékk trjáplöntu að gjöf frá Orkusölunni
Orkusalan kolefnisjafnar sínar eigin vinnslu þannig að kolefnisspor raforkunnar með tilliti til bindingar er ekkert. Í samstarfi við Eflu verkfræðistofu er haldið utan um losun stofnunarinnar með m.a. tilliti til daglegs reksturs, aksturs og flugferða starfsmanna og kolefnisjafnað með eigin skógrækt.
Orkusalan færir öllum sveitarfélögum á landinu tré til gróðursetningar og vill með því auka meðvitund forystumanna á mikilvægi virkrar þátttöku gegn loftslagsbreytingum samhliða því að veita jákvæða og skemmtilega upplifun. Sveitarfélagið þakkar vel fyrir þessa táknrænu gjöf en samkvæmt úttekt fyrir nokkrum árum var binding köfnunarefnis jákvæð innan sveitarfélagsins enda mikil skógrækt stunduð á svæðinu. Haldið verður áfram á þeirri braut.
Sveitarstjórn Fljótsdalshrepps plantaði reynitrénu á lóð Végarðs undir styrkri stjórn skógræktarfræðingsins, Lárusar Heiðarssonar, sem er jafnframt varaoddviti hreppsins.
Fyrri mynd. F.v. Halla Auðunardóttir, Lárus Heiðarsson, Jóhann F. Þórhallsson oddviti, Anna Jóna Árnmarsdóttir, Helgi Gíslason sveitarstjóri og Kjartan Benediktsson.
Seinni mynd. F.v. Halla, Anna Jóna, Lárus, Helgi og Kjartan.
Myndir: Gísli Örn Guðmundsson
