Fögur framtíð í Fljótsdal- samfélagsþing og hvað svo ?

Á tveggja daga samfélagsþingi í Fljótsdal í apríl síðastliðnum, komu fram hugmyndir að fjölmörgum verkefnum og aðgerðum til að efla byggð og samfélag, svo megi verða „Fögur framtíð í Fljótsdal“. Þetta er einmitt heitið sem samfélagsverkefni því sem Fljótsdalshreppur stendur fyrir, í samstarfi við Austurbrú, var gefið á þinginu.

Nú liggur fyrir samantekt hér um skilaboð samfélagsþingsins, unnin af Sigurborgu Kr. Hannesdóttur hjá ILDI, en hún stýrði þinginu. Hún hefur sérstaklega hrósað þátttakendum á þinginu fyrir góða og vandaða vinnu og segir að miðað við sambærileg þing sem hún hefur stýrt annars staðar á landinu undanfarin ár, hafi  aldrei legið svo mikið efni fyrir!

Í lok þingsins var rætt um hvernig ætti að fylgja því eftir. Sögðu þátttakendur mikilvægast að hrinda verkefnum og hugmyndum í framkvæmd og að engin ástæða væri til þess að bíða, því margar hugmyndanna séu framkvæmanlegar strax. Töldu þó að fyrst þyrfti samfélagsnefndin að fara yfir og þétta verkefnin, því víða sé skörun í hugmyndunum.

Nú hafa samfélagsnefnd og aðal- og varamenn í sveitarstjórn fundað um samantektina og ákveðið að byrjað verði á að gera verkefnisáætlun og grófa kostnaðargreiningu. Samfélagsnefnd mun leiða þá vinnu og leggja síðan fyrir sveitarstjórn.

Ákveðið var að verkefnið Fögur framtíð í Fljótsdal standi til ársloka 2022, en áður hafði einungis verið ákveðið að það stæði til loka þessa árs. Stefnt er að ráðningu verkefnisstjóra, en ákvörðun um starfshlutfall verður tekin þegar verkefnisáætlun liggur fyrir. Það verður hugsanlega gert í samstarfi við stofnun eða fyrirtæki og er stefnt að því að verkefnisstjóri komi til starfa næsta haust, eða í síðasta lagi um áramót 2019/2020.

Verkefnið byggir á samstarfi sveitarfélagsins, Austurbrúar og síðast en ekki síst íbúa. Stefnt er að því að setja af stað vinnuhópa og m.a. horft til þess hverjir lýstu áhuga á að fylgja hvaða hugmyndum eftir, með því að skrá nöfn sín við einstök málefni á þinginu. Útfærslan mun skýrast þegar líður að hausti. Hins vegar er öllum frjálst að eiga frumkvæði að því að hóa saman áhugasömum um hin ýmsu málefni, án aðkomu sveitarstjórnar eða samfélagsnefndar, ef fólk vill. Þá eru áhugasamir hvattir til að skrá sig á póstlista verkefnisins, með því að senda tölvupóst til oddvita, fljotdalshreppur@fljotsdalur.is – þ.e. hafi þeir ekki þegar skráð sig á póstlistann sem lá frammi á samfélagsþinginu.

Á þinginu kom fram áhugi á að halda samtalinu áfram og er stefnt að því að halda samfélagsþing í byrjun hvers árs, meðan verkefnið stendur.

Með því að gefa verkefninu lengri tíma, vinna verkefnisáætlun til að forgangsraða hugmyndum, tryggja fjármögnun, ráða verkefnisstjóra og halda áfram samtali við íbúa, eru sköpuð framúrskarandi skilyrði til að ná góðum árangri, svo megi verða fögur framtíð í Fljótsdal.